«Амонатбонк» ба ноҳияи Бохтар як миллион сомонӣ қарз медиҳад

Душанбе, 27 феврал. (АМИТ «Ховар», Покиза Маҳмадбекова). — Раиси Раёсати БДА Тоҷикистон «Амонатбонк» Гулнора Ҳасанова 26 феврали соли равон аз шурӯи сохтмони бинои филиали бонк дар ноҳияи Бохтар боздид намуда ва бо намояндагони мақомоти маҳаллии ноҳияву нафақахӯрон ва пирони рӯзгордида вохӯрӣ намуд. Ба мухбири АМИТ «Ховар» аз хадамоти матбуот ва рекламаи БДА «Амонтбонк» иттилоъ доданд, ки дар вохӯрӣ бо раиси ноҳияи Бохтар масъалаи рушди системаи бонкдорӣ дар ноҳия, пардохти нафақа тавассути кортҳои бонкӣ ва ҷудо кардани қарзҳо барои рушди соҳибкории хурду миёна баррасӣ шуд. Сарвари «Амонатбонк» иброз намуд, ки барои рушди соҳибкории хурд ва миёна дар соли равон ба ноҳияи Бохтар ба маблағи як миллион сомонӣ қарз ҷудо мешавад. Дар ҷаласаи корӣ бо кормандони филиали бонк Г. Ҳасанова нисбат ба шафофияти пардохти нафақаҳо, зиёд кардани қарзҳои хурд, ҷалби амонатҳои аҳолӣ супоришҳои мушаххас дод. Раиси Раёсати «Амонатбонк» инчунин бо кормандони филиали бонк дар ноҳияи Вахш вохӯрӣ намуда, нисбат ба дастгирии рушди кишоварзӣ ва соҳибкории хурду миёна супоришҳои мушаххас дод ва бо соҳибкорон ҷиҳати дастгирии соҳибкории хурду миёна бо пешниҳоди қарзҳои имтиёзнок ва имконияти мусоиди ҳалли мушкилоти соҳа сухан гуфт.