Арзёбии пешниҳоди Тоҷикистон аз ҷониби ЮНЕСКО

Душанбе, 20 феврал. (АМИТ «Ховар», Марзия Саидова).-Арзёбии пешниҳоди Ҷумҳурии Тоҷикистон дар мавриди ворид намудани Боғи миллии Тоҷикистон ба рӯйхати мероси умумиҷаҳонии ЮНЕСКО ба анҷом расид. Интизор меравад, ки ҳуҷҷатҳои воридшуда ва хулосаҳои коршиносон дар ҷаласаи солонаи ЮНЕСКО, ки баргузории он дар соли 2013 дар назар дошта шудааст, ба овоз гузошта хоҳад шуд. Мавриди зикр аст, ки Боғи миллии Тоҷикистон соли 1992 бо мақсади ҳифзи олами ҳайвоноту наботот, рушди туризм, истифодаи самараноки захираҳои табиӣ ташкил шуда, он дар масоҳати 2,6 миллион гектар доман густурдааст. Масоҳати Боғи миллӣ 60% қаламрави Бадахшон, 40% и ҳудуди ноҳияҳои Ҷиргатол ва Тавилдараро ташкил медиҳад. Қисмати бештари ҳудуди Боғи миллӣ аз куҳҳои сар ба фалаккашидаи 5000-6000 метр иборат аст. Водии Сангвор, кӯли Қаракӯл ва Сарез, ки дар баландкуҳ воқеъанд, қуллаи Исмоили Сомонӣ бо баландии 7495 метр, пиряхҳои азимҷуссаи Федченко ва Хирсон, ки ҳамасола онҳоро садҳо сайёҳон ва куҳнавардон дидан менамоянд, инчунин чашмаҳои гарму маъданӣ аз шоҳкориҳои табиат дар ин минтақа ба шумор мераванд. Олами ҳайвоноту набототи Боғи миллӣ гуногун буда, дар он 200 намуди гиёҳу растанӣ мерӯяд.