Баррасии Созишномаи қарзии иловагӣ

Душанбе, 4 феврал.(АМИТ «Ховар», Марзия Саидова).- Душанбею Париж дар оянда робитаҳои парлумониашонро тақвият мебахшанд.Дар робита ба ин 4 феврал палатаи поёнии парлумони Тоҷикистон дар ҷаласаи Шӯрои Маҷлиси намояндагон масъалаи ташкили гуруҳи дӯстӣ ва ҳамкории Маҷлиси намояндагони Маҷлиси Олии Ҷумҳурии Тоҷикистон бо Маҷлиси миллии Ҷумҳурии Фаронсаро мавриди баррасӣ қарор дод. Дар ҷаласаи Шӯро ҳамчунин ворид намудани тағйиру илова ба Қонуни Ҷумҳурии Тоҷикистон «Дар бораи иҷозатномадиҳӣ ба баъзе намудҳои фаъолият», «Дар бораи ҳимоя ва дастгирии давлатии соҳибкорӣ дар Ҷумҳурии Тоҷикистон», «Дар бораи фаъолияти волонтёрӣ» матраҳ гардиданд. Созишномаи қарзии иловагӣ байни Ҷумҳурии Тоҷикистон ва Фонди ОПЕК оид ба рушди байналмилалӣ дар хусуси лоиҳаи беморхонаи бисёрсоҳавии Данғараро низ аъзои Шӯрои Маҷлиси намояндагон баррасӣ намуданд. Амир Катаев ва Сафаралӣ Раҷабов –раисони кумитаҳои Маҷлиси намояндагон зимни тавзеҳи масъалаҳои мазкур иброз доштанд, ки раванди зиндагӣ доимо дар инкишоф аст ва ҳалли ин ё он масъалаи бавуҷудомада муносибати навро тақозо менамояд. Аз ин рӯ,зарурати ворид намудани тағйиру иловаҳо ба қонунҳои мазкур пеш омадааст.