Боздиди Қ. Расулзода аз Панҷакент

Душанбе, 20 феврал. (АМИТ «Ховар», Бекназари Абӯбакр). — Тайи ду рӯзи аввали ҳафтаи ҷорӣ раиси вилояти Суғд Қоҳир Расулзода ба водии Зарафшон сафари корӣ анҷом дод. Рӯзи душанбе дар ҷараёни боздиди корӣ аз шаҳри Панҷакент Қоҳир Расулзода бо ҳамроҳии вазири энергетика ва саноат Гул Шералӣ аз корхонаи муштараки «Зарафшон» дидан намуда, бо ҷараёни корҳои сохтмону васлӣ дар коргоҳи холисгардонии тилло шинос шуданд. Зимни боздид таъкид гардид, ки ин коргоҳ барои холисгардонии 5 тонна тилло дар 1 сол пешбинӣ шуда, он дар арафаи таҷлили ҷашни байналмилалии Наврӯз расман ба фаъолият шуруъ хоҳад кард.Ҳамчунин раиси вилоят аз маҷмааи таърихиву фарҳангии мақбараи устод Абӯабдуллоҳи Рӯдакӣ дар деҳаи Панҷрӯд дидан намуда, барои боз ҳам ободу хуррам гардонидан ва бо тарҳи зебо анҷом додани корҳои тармим дар ин ёдгории таърихӣ ба масъулин дастуру супоришҳои мушаххас дод.Раиси вилоят Қоҳир Расулзода аз сарбанди канали «Марғедар», пойгоҳи обкашии «Дупула» боздид ба амал оварда, дар кооперативи истеҳсолии ба номи Фирдавсӣ ба кишти баҳории картошка оғоз бахшид ва дар маъракаи ниҳолшинонӣ ширкат варзид.Ҳамчунин раиси вилоят дар ҷаласаи корӣ бо иштироки раисони ҷамоати деҳот, хоҷагиҳои деҳқонӣ, роҳбарони ташкилоту муассисаҳои шаҳри Панҷакент натиҷаҳои сафари кории хешро азрёбӣ карда, дар назди роҳбарияти шаҳри Панҷакент ва дигар масъулин вазифагузорӣ намуд.