Чемпионҳо идрорпулӣ мегиранд

Душанбе, 4 январ. (АМИТ «Ховар», Музаффар Рустамов).– Аз ҷониби Кумитаи байналмилалии олимпӣ барои омодагии ду нафар варзишгари тоҷик дар мусобиқаҳои литсензионӣ- яке Андрей Дригин ва дигаре Соҳибназари Турсунмурод идрорпулии олимпӣ ҷудо мегардад. Ин маблағ баҳри омодагии ин ду варзишгар ба Бозиҳои олимпии зимистонаи Сочи-2014 масраф мегардад.  Бояд тазаккур дод, ки Андрей Дригин борҳо шарафи кишвари моро дар мусобиқаҳои байналмилалӣ ҳимоя менамояд ва аз ин пештар дар Бозиҳои олимпии зимистонаи Ванкувер ширкат намуда буд. Ба иттилои сухангӯи Кумитаи миллии олимпии ҶТ Муродалӣ Тешаев Соҳибназари Турсунмурод 17-сол дошта, дар Бозиҳои зимистонаи Эрон, Қазоқистон ва дигар мусобиқаҳо ширкат намудааст. Ӯ чемпиони Ҷумҳурии Тоҷикистон оид ба лижаронӣ мебошад.