Энергетикаи ҶТ рушд меёбад

Душанбе, 25 феврал. (АМИТ «Ховар», Покиза Маҳмадбекова). – Чанде пеш дар шаҳри Душанбе мулоқоти вазири молияи Тоҷикистон Сафаралӣ Наҷмиддинов ва ҳайати Бонки умумиҷаҳонӣ бо сардории роҳбари Барномаи рушди энергетика дар Осиёи марказӣ Сунил Хосла баргузор гардид. Тавре ки аз котиботи Вазорати молия ба АМИТ «Ховар» хабар доданд, ҷонибҳо дар ҷараёни мулоқот перомуни масоили мубрам ва дурнамои ҳамкорӣ дар бахшҳои молиявию бонкӣ ва соҳаҳои дигари фаъолият табодули афкор намуданд.Мусоҳибон ба масоили рушди бахши энергетикаи Тоҷикистон, аз ҷумла ба таҳлили техникию иқтисодии бунёди хатти интиқоли барқи CASA (КАСА) – 1000 таваҷҷӯҳи хоса зоҳир намуданд.Зимни мулоқот ҳамчунин имконияти татбиқи барномаҳои дурнамо, расонидани ёрии молиявию техникӣ ба Тоҷикистон ва мақоми созмонҳои молиявии ҷаҳонӣ дар ин самт мавриди муҳокима қарор гирифт.Вазири молияи кишвар зикр намуд, ки тайи давраи ҳамкорӣ бо Бонки умумиҷаҳонӣ дар амри роҳандозии ислоҳоти бахшҳои молиявии ҶТ дастовардҳои зиёде ба назар расид.