Хонаи дуҳуҷрадор ба шаҳрванди ҳаштмиллионум

Душанбе, 25 феврал.(АМИТ «Ховар», Марзия Саидова).- Шаҳрдории Душанбе ба шаҳрванди ҳаштмиллионуми Ҷумҳурии Тоҷикистон Сумайя хонаи дуҳуҷрадор тақдим менамояд. Манзили истиқоматие, ки ба шаҳрванди 8-миллионуми Тоҷикистон ҷудо шудааст, дар ошёнаи якуми бинои № 11/10-и кӯчаи Федини пойтахт воқеъ буда, масоҳати умумиаш 60,2 метри мураббаъ мебошад. Ҳамзамон дар асоси қарори раиси шаҳри Душанбе Сарраёсати молияи шаҳри Душанбе муваззаф гардидааст, ки ба шаҳрванди ҳашмиллионум 8 000 сомонӣ кӯмакпулии якдафъаина расонида, ба номи ӯ дар Бонки давлатии амонатгузории Ҷумҳурии Тоҷикистон «Амонатбонк» суратҳисоби шахсӣ низ кушода мешавад. Инчунин аз ҷониби Раёсати тандурустӣ ба шаҳрванди ҳашмиллионум табиби доимӣ вобаста мегардад.