Иродаи мустаҳкам ва фаъолияти серҷабҳа

Душанбе, 7 феврал. (АМИТ «Ховар», Ҳотам Рабиев).- Дар яке аз набардҳои шадиди ҷанги Афғонистон маҳрум шудан аз ду пой иродаи матин ва оҳанини ҷанговари интернатсионалист Ибодулло Шарифовро шикаста натавонист. Ибодулло Шарифов моҳи августи соли 1983 баъди бардоштани ҷароҳати вазнин дар набарди ҷангӣ аз ҳар ду пой маҳрум гашт ва то солҳои 1987 дар дармонгоҳҳои калони Русия шаҳрҳои Маскав, Санкт-Петербург ва Екатеринбург табобат ёфта, бо пойҳои сунъӣ таъмин гашт.Аз соли 1987 то соли 1990 дар ҷои кори аввалааш, яъне кафедраи кимиёи таҳлилии Донишгоҳи миллӣ ба ҳайси корманди калони илм кор кард. Аз соли 1990 чун ассистенти кафедраи дорусозӣ ва заҳршиносии Донишгоҳи давлатии тиббии Тоҷикистон ва то соли 2004 ба ҳайси муаллими калони ҳамин донишгоҳ фаъолият дошт. Соли 2004 рисолаи илмиро дар мавзӯи «Мувозинати ҳосилшавии пайвастҳои комплексии оҳан бо лигандҳои гетеросиклӣ» бо муваффақият ҳимоя кард. Соҳиби беш аз 39 мақолаи илмӣ ва 5 пешниҳоди навоварона мебошад. Аз соли 2006 то имрӯз дотсенти кафедраи кимиёи дорусозӣ ва заҳршиносии Донишгоҳи давлатии тиббии Тоҷикистон ба номи Абӯалӣ ибни Сино аст.Ибодулло Шарифов бо ордени «Байрақи сурхи ҷангӣ»; медал барои «Шуҷоат», Ифтихорномаи фахрии Президиуми Шӯрои Олии Иттиҳоди Шӯравӣ ва беш аз 15 медали ҷашнӣ сарфароз гардидааст. Ӯ раиси шуъбаи Кумитаи кор бо ҷанговарони интернатсоналисти ноҳияи Сино, муовини раиси Кумитаи кор бо ҷанговарони интернатсоналисти Ҷумҳурии Тоҷикистон, аъзои комиҷроияи Ҳизби Халқии Демократии Тоҷикистон дар шаҳри Душанбе ва раиси ташкилоти ибтидоии «Башардӯст»-и Ҳизби Халқии Демократии Тоҷикистон дар ноҳияи Синои пойтахт аст.