Машғулияти таълимӣ барои кормандони мақомоти сарҳадот

Душанбе, 26 феврал. (АМИТ «Ховар»). — Имрӯз, 26 феврал, дар шаҳри Душанбе машғулияти панҷрӯзаи таълимӣ барои кормандони мақомоти сарҳадӣ, муҳоҷират, гумрукӣ, байторӣ ва санитарию эпидемиологии кишварҳои Осиёи Марказӣ оғоз ёфт. Машғулият бо ибтикори Барномаи рушди иқтисодии Созмони Милали Муттаҳид ва мусоидати раёсати сарҳадот дар Осиёи Марказӣ роҳандозӣ шудааст. Коршиносони оянда дар ҷараёни машғулияти таълимӣ малакаҳои омӯзгории худро бо кӯмаки ду нафар омӯзгорони таҷрибадори Иттиҳоди Аврупо такмил дода, табодули таҷриба менамоянд.Вазифаҳои барномаи мазкур аз таҳкими амнияти Осиёи Марказӣ ва дастгирии тиҷорату транзити қонунӣ, ҳамчунин ҷилавгирии марзҳои кишварҳои Осиёи Марказиро хилофи қонун убур намудани мардум иборат мебошад.Барномаро Иттиҳоди Аврупо маблағгузорӣ намуда ва онро Созмони Милали Муттаҳид дар амал татбиқ менамояд.Дар ин бора аз Намояндагии Иттиҳоди Аврупо дар Тоҷикистон ба АМИТ «Ховар» хабар доданд.