Медали ҷашнии Вазорати мудофиа ба Вазири корҳои дохилӣ

Душанбе, 22 феврал. (АМИТ «Ховар», Ибодат Давлатова).-Имрӯзҳо дар саросари мамлакат тантанаҳои таҷлили 20-умин солгарди Артиши миллии ҷумҳурӣ дар рӯҳияи фараҳмандиву нишот идома дошта, ҷашну маросимҳои театркунонидашудаи наврасону ҷавонон дар тамоми мактабу муассисаҳои таълимӣ ва дар қисмҳои ҳарбиву низомии ҳамаи сохторҳои қудратии мамлакат ба роҳ монда шудааст.Лозим ба ёдоварист, ки бахшида ба Рӯзи таъсисиёбии Қувваҳои Мусаллаҳи кишвар бисёре аз кормандони мақомоти корҳои дохилӣ аз ҷониби Сарфармондеҳи Олии Қувваҳои Мусаллаҳи Ҷумҳурии Тоҷикистон, Эмомалӣ Раҳмон бо мукофотҳои давлатӣ ва рутбаҳои баланди генералӣ сарфароз гардонида шуда буданд. Дар радифи тантанаҳои ҷашнӣ субҳи имрӯз Вазири корҳои дохилии Ҷумҳурии Тоҷикистон генерал-лейтенанти милитсия Рамазон Раҳимов бо фармони Вазири мудофиаи Ҷумҳурии Тоҷикистон генерал-полковник Шералӣ Хайруллоев барои хизматҳои шоистааш дар таҳкими суботу оромӣ дар кишвар бо медали ҷашнии «20-умин солгарди Артиши Миллӣ» сарфароз гардонида шуд. Дар ин бора ба мухбири АМИТ «Ховар» аз ВКД хабар доданд.