Мизи мудаввар роҷеъ ба ҳамкориҳои сармоягузорӣ

Душанбе, 13 феврал. (АМИТ «Ховар», Раъно Нусратуллоева).-Ҳамкориҳои судманди Ҷумҳурии Тоҷикистон ва Бонки Авруосиёии рушд дар соҳаи сармоягузорӣ дар маркази диққати ширкаткунандагони мизи мудаввар, ки дирӯз дар Китобхонаи миллии Тоҷикистон баргузор гардид, қарор гирифт. Дар кори форум муовини аввали сарвазири Ҷумҳурии Тоҷикистон Матлубхон Давлатов, муовини сарвазир Муродалӣ Алимардонов, роҳбарони вазоратҳо ва идораҳои Ҷумҳурии Тоҷикистон ва ҳайати Бонки рушди АвруОсиё бо роҳбарии раиси раёсати Бонк Игор Финогенов, ки дар чорчӯбаи сафари корӣ дар Тоҷикистон қарор дорад, инчунин намояндагони доираҳои тиҷоратии Тоҷикистон ва Қазоқистон ширкат намуданд. Дар кори Форум маърӯзаҳо дар бораи истифодаи имкониятҳои сармоягузорӣ дар Ҷумҳурии Тоҷикистон ва имкониятҳои бонкҳо ва стратегияи сармоягузории бонк, инчунин маблағгузорӣ барои татбиқи бомуваффақияти лоиҳаҳои инвеститсионӣ дар Ҷумҳурии Тоҷикистон шунида шуданд. Дар фарҷоми кори Форум изҳороти муштараки Ҳукумати Ҷумҳурии Тоҷикистон ва Раёсати Бонки Авруосиё дар бораи таҳкими ҳамкориҳо ба имзо расид. Ҳуҷҷатҳоро муовини аввали сарвазири Ҷумҳурии Тоҷикистон Матлубхон Давлатов ва раиси раёсати Бонки Авруосиёии рушд Игор Финогенов имзо намуданд.