Мулоқоти Ҳ. Зарифӣ бо роҳбарияти ширкати нафтугазии «Total»

Душанбе, 13 феврал. (АМИТ «Ховар»).- 11 феврали соли 2013 дар чаҳорчӯби сафари корӣ ба ш.Париж вазири корҳои хориҷии Ҷумҳурии Тоҷикистон Ҳамрохон Зарифӣ бо роҳбарияти ширкати нафтугазии «Total» — ноиби раис оид ба стратегияи рушди корӣ Оливие де Лангаван, Ноиби Раис оид ба бастани шартномаҳои нав ва идораи саҳмияҳо Эрве Шаню, ноиби раис Филипп Эрго ва мудири корҳои тадқиқотӣ ва истеҳсолот Марк Блезо вохӯрд. Ҳадафи вохӯрӣ муҳокимаи масъалаҳои ба роҳ мондани ҳамкорӣ байни Ҷумҳурии Тоҷикистон ва ширкати «Total» дар соҳаи истихроҷ ва коркарди захираҳои нафтугазӣ буд. Дар оғози суҳбат вазири корҳои хориҷӣ ба мусоҳибони худ дар бораи фазои сармоягузорӣ ва ҳолати канданиҳои фоиданок ва ашёи хоми кишвар маълумот дод. Ӯ гуфт, ки ҳоло дар Тоҷикистон ширкатҳои маъруф, ба монанди «Tetis Petroleum» ва «Газпром» фаъолият менамоянд. Ҳамрохон Зарифӣ таъкид сохт, ки ҷумҳурӣ соҳиби захираҳои бойи табиӣ буда, омода аст бо ширкати мазкури фаронсавӣ дар соҳаҳои дахлдор ҳамкории самаранок ба роҳ монад. Дар навбати худ ноиби раис Оливие де Лангаван ҳавасмандӣ ва омодагии ширкати худро дар ҷустуҷӯйи роҳҳои мушаххаси таъсис ва рушди ҳамкорӣ бо Тоҷикистон дар соҳаи нафтугазӣ изҳор дошт.