Мулоқоти ҳайати афсарони Вазорати мудофиа бо афсарони ДТТ

Душанбе, 21 феврал. (АМИТ «Ховар»). — Тибқи иҷрои нақшаи чорабиниҳои «10-иқдоми «Созандагони Ватан» бахшида ба 20- солагии Артиши миллии Ҷумҳурии Тоҷикистон» аз ҷониби Ташкилоти ҷамъиятии ҷавонон «Созандагони Ватан» дар ш. Душанбе ва н.Шоҳмансур 21 феврал дар Донишгоҳи техникии Тоҷикистон ба номи М.С. Осимӣ мулоқоти донишҷўён бо афсарони Вазорати мудофиаи Ҷумҳурии Тоҷикистон ва афсарони кафедраи ҳарбии донишгоҳ баргузор гашт. Роҳбари намояндагии ТҶҶ «Созандагони Ватан» дар н.Шоҳмансур Б. Боев кулли устодон, донишҷўён ва афсарони кафедраи ҳарбии донишгоҳро бо 20- солагии Артиши миллии Ҷумҳурии Тоҷикистон табрик намуда, роҳбари кафедраи ҳарбии донишгоҳ полковник Ф.Б. Нуров барои хизматҳои шоёнаш дар тарбияи ҳарбию ватандўстии донишҷўён дар донишгоҳ бо «Ифтихорнома»-и ТҶҶ «Созандагони Ватан» дар н.Шоҳмансур ва тўби баскетол ва шоҳмот қадрдонӣ кард. Инчунин ба роҳбарияти Донишгоҳи техникии Тоҷикистон барои баргузор намудани чунин чорабинӣ миннатдории худро аз номи роҳбарияти ТҶҶ «Созандагони Ватан» баён намуд. Пас аз ин байни донишҷўёни донишгоҳ мусобиқаи ба қисмҳо ҷудо намудан ва якҷоя намудани автомати Калашников, гурзбардорӣ, ба саволҳо ҷавоб гуфтан баргузор гашт, ки аз ҷониби ҳайати комиссияи тадорукоти Донишгоҳи техникии Тоҷикистон ва роҳбари намояндагии ТҶҶ дар ш.Душанбе Т. Раупов туҳфаҳо супорида шуд. Дар интиҳои озмун аз ҷониби дастаи ҳаваскорони Донишгоҳ бо барномаи фарҳангӣ хотири афсарон ва иштирокчиён шод гардонида шуд.