Намоиш-фурӯши осори рассомони тоҷик дар Лондон

Душанбе, 19 феврал. (АМИТ «Ховар», Баҳманёр Муродов). – Мусаввараҳои рассомони тоҷик ва минтақаи Осиёи Миёнаву Қафқозро ширкати маъруфи музоядавии «Sotheby’s» дар шаҳри Лондон ба намоиш ва фурӯш мегузорад. Сомонаи расмии ин ширкат иттилоъ додааст, ки намоиш ва фурӯши дастранҷи рассомони минтақаи Осиёи Миёнаву Қафқоз бо номи «Дар чорроҳа» аз 4-ум то 12-уми март дар бинои марказии ин ширкат, дар Ню-Бонд Стрити Лондон баргузор гардида, дар чорабинӣ зиёда аз 50 асари рассомони ин минтақа ба намоиш гузошта мешавад. Ҳамчунин ба гуфтаи сомонаи мазкур нархи ибтидоии мусаввараҳо дар ин музоядаи байналмилалӣ ҳудуди 3 ҳазор доллари амрикоиро ташкил медиҳад.