Нашри аввалин китоби таълимӣ оид ба муҳоҷират

Душанбе, 19 феврал. (АМИТ «Ховар», Лутфия Эшонқулова).- «Муқаддимаи муҳоҷиратшиносӣ»- таҳти чунин ном матбааи АИ ҶТ «Дониш» китоби нави сиёсатшиносони тоҷикро аз чоп баровард.Тавре ки ба хабарнигори АМИТ «Ховар» муаллифи китоб Моёншо Маҳмадбеков хабар дод, китоби мазкур дар ҳамдастӣ бо номзадҳои илми иқтисодӣ Парвиз Ҳакимов ва Сайалӣ Мирзоев омода шуда, дар он ҳамаи омилҳои муҳоҷират мавриди омӯзиш ва таҳқиқ қарор гирифтаанд. Ба иттилои муаллиф, дар солҳои охир таваҷҷуҳ нисбат ба дарки назарии масъалаҳои муҳоҷират дар Тоҷикистон меафзояд ва баррасии ин масъала дар давраи кунунӣ яке аз мавзуъҳои доғи рӯз ба ҳисоб меравад. «Муқаддимаи муҳоҷиратшиносӣ» аввалин китоби таълимие мебошад, ки дар он паҳлуҳои мусбату манфии раванди муҳоҷирати аҳолӣ, сабабҳои муҳоҷират, шаклҳои муҳоҷирати аҳолӣ, методи баҳисобгирии муҳоҷиратӣ, сиёсати давлатии ҶТ дар бораи муҳоҷират, асосҳои қонунии раванди муҳоҷират ва дигар мавзуъҳои вобаста ба муҳоҷират инъикос гардидаанд.«Муайян намудани таъсири муҳоҷират, моҳият ва хусусиятҳои асосии он, қувваҳои ҳаракатдиҳанда ва муайянкунандаи рафтори муҳоҷирони корӣ, масъалаҳои асосие ба ҳисоб мераванд, ки бояд омӯхта шаванд», афзуд М. Маҳмадбеков ва илова намуд, ки китоби мазкур дар баланд бардоштани савияи дониши донишҷӯён, кормандони давлатӣ, ки ба масъалаҳои муҳоҷират сарукор доранд ва он шаҳрвандоне, ки ба хориҷа барои кор мераванд, аҳамияти хосса дорад.