Нашри маълумотномаи нав барои журналистон

Душанбе, 16 феврал. (АМИТ «Ховар», Лутфия Эшонқулова).- Иттифоқи журналистони Тоҷикистон маълумотномаи нави иттилоотиро бо унвони «Кормандони касбии медиа-индустрияи Тоҷикистон» таҳия ва ба чоп омода намудааст. Нашрия ба рӯзи матбуоти тоҷик бахшида мешавад.Тавре ки ба АМИТ «Ховар» аз Иттифоқи журналистон иттилоъ доданд, маълумотнома рӯйхати пурраи суроғаҳо, рақамҳои телефонӣ ва маълумоти мухтасарро дар бораи самтҳои асосии фаъолияти тамоми васоити ахбори оммаи чопӣ ва электронӣ, муассисони он, роҳбарон ва мутахассисони пешбари он, инчунин дигар маълумоти муфиду шавқоварро дар бар мегирад. Муҳтавои маълумотномаи нав аз маълумотномаҳои дигари таҳлилӣ ба таври назаррас фарқ мекунад. Аз ҷумла дар он иловатан ноширон ва муассисони ВАО, теъдоди баёншуда, нашри даврӣ, тарзҳои паҳнкунӣ, сана, бақайдгузорӣ ва дигар чизҳо нишон дода шудаанд. Маълумотнома бо теъдоди умумии 1 ҳазор нусха нашр гардида, ройгон тақсим мешавад.