Оғози паради ҳарбӣ дар Душанбе

Душанбе, 23 феврал. (АМИТ «Ховар»).- Ба муносибати таҷлили 20-умин солгарди таъсисёбии Қувваҳои мусаллаҳи Ҷумҳурии Тоҷикистон ин лаҳзаҳо дар майдонии «Дӯстӣ»-и пойтахт бо иштироки Президенти Ҷумҳурии Тоҷикистон, Сарфармондеҳи олии Қувваҳои Мусаллаҳ Эмомалӣ Раҳмон паради ҳарбӣ ҷараён дорад. Ёдовар мешавем, ки аз 1-уми декабри соли 2012 инҷониб бо мақсади дар сатҳи баланд ҷашн гирифтани 20-умин солгарди таъсиси Қувваҳои Мусаллаҳи Ҷумҳурии Тоҷикистон, бо ҷалби ҷузъу томҳои сохторҳои қудратии гарнизони ҳарбии Душанбе дар яке аз гӯшаҳои пойтахт омодагӣ ба паради ҳарбӣ ҷараён дошт.Омодагӣ ба паради ҳарбӣ таҳти роҳбарии Фармондеҳи Қӯшунҳои зудамали Вазорати мудофиаи Ҷумҳурии Тоҷикистон, сардори гарнизони ҳарбии Душанбе, генерал-майор Латиф Файзиев ҷараён гирифта, дар он ҳайати шахсии навъҳои Қӯшуни Қувваҳои мусаллаҳ, аз ҷумла Қӯшунҳои хушкигард, Қӯшунҳои зудамал, Қувваҳои ҳарбию ҳавоӣ ва мудофиаи зиддиҳавоӣ, қисму воҳидҳои низомии алоҳидаи тобеи Вазорати мудофиаи ҷумҳурӣ, ҷузъу томҳои Гвардияи миллӣ, Қӯшунҳои дохилӣ, муассисаҳои таълимии ҳарбӣ, Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон, Вазорати адлияи Ҷумҳурии Тоҷикистон, Қӯшунҳои сарҳадии Кумитаи давлатии амнияти миллии Ҷумҳурии Тоҷикистон, ки дар маҷмуъ шумораи умумии онҳоро қариб даҳ ҳазор нафар ташкил медиҳанд, ширкат доранд.