Пешгирии се ҷиноят дар Бадахшон
Душанбе, 5 феврал. (АМИТ «Ховар», Бекназари Абӯбакр). — 29 январи соли равон кормандони Раёсати Кумитаи давлатии амнияти миллии Ҷумҳурии Тоҷикистон дар Вилояти Мухтори Куҳистони Бадахшон якҷоя бо хизматчиёни ҳарбии Сарраёсати қӯшунҳои сарҳадӣ дар ҳудуди деҳаи Ёмчи ҷамоати Сохчарви ноҳияи Шуғнон амалиёти фаврию ҷустуҷўӣ гузаронида, дар натиҷа бо қочоқчиён аз ҳисоби шаҳрвандони Ҷумҳурии Исломии Афғонистон, ки мехостанд сарҳади давлатиро бо мақсади интиқоли маводи мухаддир ғайриқонунӣ убур намоянд, задухўрди мусаллаҳона ба амал омад. Ҳангоми азназагузаронии ҷойи ҳодиса ҷасади яке аз қочоқбарони ашаддӣ, сокини 28 — солаи улусволии Шуғнони вилояти Бадахшони Афғонистон Анвар валади Мубориз дарёфт гардида, ҳамчунин як автомати Калашников бо тирдонаш, 530 грамм маводи мухаддири сахттаъсири навъи героин, 1 килову 605 грамм ҳашиш мусодира шуд.Тавре ки ба АМИТ Ховар аз маркази робитаҳои ҷамъиятии КДАМ иттилоъ доданд, худи ҳамон рўз боз як амалиёт дар минтақаи дидбонгоҳи сарҳадии “Шидз” амалӣ гардид. Бо гумони қочоқи ғайриқонунии маводи тамоку тавассути сарҳади давлатӣ аз Афғонистон ба Тоҷикистон шаҳрвандони Ҷумҳурии Тоҷикистон Мирамбахшов Карам Хуҷаназарович, Шогунбеков Тилло Бачамардович, Азизмамадов Матлабшо Мамадамонович ва шаҳрванди ҶИА Муродмамад валади Шакармамад боздошт шуданд. Аз номбурдагон ба миқдори 6 ҳазору 500 қуттӣ маводи тамокуи тамғаи “Pine” мусодира гардид. Рўзи 26 январ сокинони деҳаи Нишуспи ноҳияи Шуғнон Мирзоев Убайдулло Мамадатоевич, Зеваршоев Солеҳ Исломбекович ва Шанбиев Муслим Элназарович марзи давлатии Ҷумҳурии Тоҷикистонро бо ҶИА ғайриқонунӣ убур намуда, аз ҷониби сарҳадбонони Афғонистон дастгир шуданд. Тибқи созишномаи байнидавлатии Тоҷикистону Афғонистон номбурдагон ба кишвари мо истирдод гардида, ба ихтиёри РКДАМ ҶТ дар ВМКБ супорида шуданд.Бо кадом мақсад ин афрод ғайриқонунӣ ба қаламрави кишвари ҳамсоя гузаштанд, тафтишот муайян хоҳад кард. Дар айни замон аз рўи ҳодисаҳои мазкур аз тарафи РКДАМ ҶТ дар ВМКБ парвандаҳои ҷиноятӣ оғоз гардида, тафтишоти пешакӣ давом дорад. Маврид ба ёдоварист, ки тибқи қонунгузории амалкунандаи ҶТ, шаҳрвандон бе иҷозати расмӣ ва ҳуқуқӣ набояд марзи давлатиро убур намоянд. Вале тавре ки мебинем, шахсони алоҳида дар ВМКБ ин талаботи қонунро дағалона вайрон карда, дар баробари кўшишҳои сарҳадшиканӣ, ҳамчунин ба ҷиноятҳои вазнини гардиши ғайриқонунии маводи нашъадор ва қочоқи тамоку даст мезананд. Ҷинояткорон бояд фаромўш насозанд, ки марзу буми ҳар як кишвари соҳибихтиёр ба ҳайси нишонаи муҳими давлатдории он эътироф шудааст. Сарҳади давлатии Тоҷикистон ҳамчун сипари устувору боэътимод ба таври доимӣ, қотеъона, беамон муҳофизат шуда, қонуншиканон барои аъмоли худ ҳатман посухи сазовор хоҳанд гирифт.








Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд
Мардуми ноҳияи Рашт дар симои Пешвои миллат наҷотбахши миллату давлат, кафили сулҳу ваҳдат ва эҳёгари фарҳанги миллиро мебинанд






