Пешниҳоди маърӯзаи Ваколатдор оид ба ҳуқуқи инсон

Душанбе, 27 феврал. (АМИТ “Ховар” Дилшодаи Хайрулло).-Тибқи Қонуни Ҷумҳурии Тоҷикистон «Дар бораи Ваколатдори ҳуқуқи инсон дар Ҷумҳурии Тоҷикистон» моҳи феврали соли равон маърӯзаи навбатии Ваколатдори ҳуқуқи инсон ба мақомоти дахлдори давлатӣ пешниҳод шуд. Дар маърӯза фаъолияти мақомоти Ваколатдори ҳуқуқи инсон дар соли 2012, вазъи ҳуқуқу озодиҳои инсон ва шаҳрванд дар Ҷумҳурии Тоҷикистон мавриди таҳлил қарор гирифта, дар он 93 тавсияи дахлдор барои беҳтар намудани вазъи ҳуқуқу озодиҳои инсон ва шаҳрванд пешниҳод гардид. Мақсади асосии маърӯза ҷалби таваҷҷуҳи мақомоти ҳокимияти давлатӣ, созмонҳои ғайридавлатӣ,байналмилалӣ ва ҷомеаи шаҳрвандӣ ба пешрафт ва мушкилоти ҷойдошта дар бахши ҳуқуқ ва озодиҳои инсон дар Тоҷикистон мебошад. Ҳамчунин маърӯза тақозо менамояд, ки мақомоти ҳокимияти давлатӣ масъалаи мазкурро мавриди баррасӣ қарор дода, барои бартараф намудани камбудию норасоиҳои мавҷуда дар роҳи татбиқи талаботи Конститутсияи Ҷумҳурии Тоҷикистон, ки инсон, ҳуқуқ ва озодиҳои онро арзиши олӣ эътироф кардааст, тадбирҳои мушаххас андешанд.