Рӯзи нерӯгоҳҳои барқии хурд дар Тоҷикистон

Душанбе, 22 феврал. (АМИТ «Ховар», Дилшодаи Хайруллоҳ). — 27 феврали соли 2013 бахшида ба «Рӯзи нерӯгоҳҳои барқии хурд дар Тоҷикистон» дар шаҳри Душанбе дар маҷлисгоҳи Созмони бехатарӣ ва ҳамкорӣ бо Аврупо (ОБСЕ) гузаронидани машварат дар мавзӯи «Рӯзи нерӯгоҳҳои барқии хурд дар Тоҷикистон: таҷриба ва пешравӣ» дар назар аст.Машварат таҳти сарпарастии Вазорати энергетика ва саноати Ҷумҳурии Тоҷикистон ва бо дастгирии намояндагии Созмони бехатарӣ ва ҳамкорӣ бо Аврупо (ОБСЕ) ва барномаи «Рӯзи нерӯгоҳҳои барқии хурд дар Тоҷикистон» ташкил шудааст. Дар машварат Консепсияи ҷалби сармоя ба нерӯгоҳҳои хурди Тоҷикистон муаррифӣ гардида, масъалаҳои пешбинии рушди нерӯгоҳҳои барқии хурди Тоҷикистон, натиҷаҳои корҳои баанҷомрасида ва ҳалли онҳо дар самти рушди нерӯгоҳҳои барқии хурди Тоҷикистон ва пешравии чорабиниҳо оид ба тараққиёти бахши нерӯгоҳҳои хурд дар оянда мавриди баррасӣ қарор мегирад.Дар машварат намояндагони мақомоту идораҳои расмӣ ва ташкилотҳои давлатӣ ва ғайридавлатӣ, Созмони бехатарӣ ва ҳамкорӣ бо Аврупо (ОБСЕ) дар Тоҷикистон, Маркази рушди нерӯгоҳҳои барқии хурд, ШСХК «Барқи тоҷик», Бонки байналмилалӣ, ширкати «Помир энерҷи», Барномаи норвегию — тоҷикии «Рушди нерӯгоҳҳои барқии хурд дар Тоҷикистон», Барномаи рушди ташкилотҳои байналмилалӣ (ПРООН), Ташкилоти байналмилалии молиявӣ (МФК) иштирок хоҳанд кард.Дар ин бора аз котиботи Вазорати энергетика ва саноати Ҷумҳурии Тоҷикистон ба АМИТ «Ховар» хабар доданд.