Сафири Тоҷикистон Эътиборномаҳоро супурд

Душанбе, 22 феврал. (АМИТ «Ховар»). — Сафири Ҷумҳурии Тоҷикистон дар Ҷумҳурии Қирғизистон Олим Раҳимов Эътиборномаҳоро ба Президенти Қирғизистон Алмазбек Отамбоев супурд. Алмазбек Отамбоев дар ҷараёни мулоқот Олим Раҳимовро бо шурӯи расмӣ ба иҷрои мансабаш муборакбод карда, зикр намуд, ки Ҷумҳурии Қирғизистон хоҳони рушди минбаъдаи муносибатҳои ҳамсоягии нек бо Ҷумҳурии Тоҷикистон ва густариши ҳамкории дуҷониба мебошад. Сафири Тоҷикистон дар навбати худ иброз дошт, ки халқҳои Тоҷикистону Қирғизистонро муносибатҳои зичи таърихии дӯстию ҳамсоягии нек бо ҳам пайвастаанд. Рушди муносибатҳои дуҷонибаи мутақобилан муфид бо Ҷумҳурии Қирғизистон яке аз самтҳои асосии сиёсати хориҷии Тоҷикистон дар минтақаи Осиёи Марказӣ ба шумор меравад.