Шўрои байнидавлатии «Радионавигатсия»

Душанбе, 20 феврал. (АМИТ «Ховар», Ибодат Давлатова).-Нимаи аввали моҳи феврали соли 2013 дар шаҳри Остона- пойтахти Ҷумҳурии Қазоқистон ҷаласаи навбатии Шўрои байнидавлатии «Радионавигатсия» баргузор гардид. Тавре ки ба мухбири АМИТ «Ховар» аз маркази матбуотии «Фурудгоҳи байналмилалии Душанбе» иттилоъ доданд, дар кори Шўро сардори Хадамоти таъминоти радиотехникии алоқаи фурудгоҳи Душанбе Абдураҳмон Саломов иштирок намуд. Ба гуфти манбаъ, 20 сол муқаддам кишварҳои собиқ Иттиҳоди Шўравӣ- ҷумҳуриҳои Тоҷикистон, Русия, Беларус, Қазоқистон, Украина ва дигарҳо Шўрои байнидавлатии «Радионавигатсия»-ро таъсис доданд. Ташкили шўрои «Радионавигатсия» имкон дод, ки иқтидори илмию техникии таъминоти радионавигатсионӣ, ки бо истифода аз системаҳои моҳворавӣ фаъолият менамояд, дар ҳудуди кишварҳои ИДМ нигоҳ дошта шавад. Бояд гуфт, ки ҷаласаҳои Шўро дар кишварҳои аъзо баргузор гардида, барои солҳои баъдӣ нақшаи корӣ ва вазифаҳоро муайян менамояд. Тавре ки маълум аст, барои парвоз ба минтақаҳои гуногуни олам аз хизматрасонии кормандони радионавигатсия пурра истифода мешавад.Ба гуфти Абдураҳмон Саломов дар доираи кишварҳои аъзо Тоҷикистон мақоми хосса дошта, касбияти баланди кормандони соҳаи радионавигатсия дар ҷаласаи шўрои навбатӣ зикр шуд. Бояд гуфт, ки намояндаи Ҷумҳурии Тоҷикистон дар Шўрои байнидавлатии «Радионавигатсия» А. Саломов бори дуюм аст, ки аз ҷониби роҳбарияти шўро бо таърифнома сарфароз гардонида мешавад.