Супоришҳои ҷашнии Қосим Қосимов

Душанбе, 13 феврал. (АМИТ «Ховар», Дилшодаи Хайруллоҳ).- Дирӯз зимни баргузории ҷаласаи машваратӣ вазири кишоварзии ҶТ Қосим Қосимов кормандони дастгоҳи вазорат ва ташкилотҳои зерсохтори онро бо вазифаҳое, ки Президенти кишвар дар ҷаласаи васеи Ҳукумати ҶТ дар назди кормандони вазорату идораҳои кишвар гузошт, ошно сохт. Вазири кишоварзӣ ба кормандони дастгоҳи вазорат супориш дод, ки дар давраи то 1 марти соли ҷорӣ барои бошукуҳ ва хотирмон гузаронидани чорабиниҳои ҷумҳуриявие, ки ба таҷлили 20-солагии Артиши миллӣ, Рӯзи Модар, вохӯрии Президенти ҶТ Эмомалӣ Раҳмон бо зиёиёни кишвар, ҷашни байналмилалии «Наврӯз-2013» бахшида шудаанд, тамоми кӯшишу ғайрати хешро сарф намоянд.Қ. Қосимов таъкид кард, ки ба баргузории маъракаи аспдавонӣ дар варзишгоҳи «Наврӯзгоҳ» -и пойтахт бояд диққати махсус дод, зеро Сарвари давлат таъкид намудааст, ки ин маърака на танҳо дар пойтахт, балки дар рӯзҳои таҷлили ҷашни Наврӯз дар тамоми ноҳияҳои ҷумҳурӣ бояд гузаронида шавад, зеро ин анъанаи миллии қадимии мост. Дар ҷаласа барои расонидани кӯмаки ҳамаҷониба ба интернати пиронсолон ва маъюбони ноҳияи Ёвон, инчунин ташкили намоишу фурӯши қаламчаҳои дарахтони мевадиҳанда, кучати гулҳо ва тухмиҳои зироатҳои гуногун дар шаҳру навоҳии ҷумҳурӣ супориш дода шуд.