Таҷлил аз Рӯзи байналмилалии радио

Душанбе, 1 феврал. (АМИТ «Ховар»). – Бахшида ба таҷлили Рӯзи байналмилалии радио Би-Би-Си, Радиои байналмилалии Чин, Монте-Карло Дуалия, Радиои байналмилалии Испания, Радиои байналмилалии Фаронса, Радиои Шарқ ва радиои «Садои Русия» 13 феврал аз қароргоҳи ЮНЕСКО як силсила барномаҳоро мустақиман пахш менамоянд.Дар ин рӯз дар ЮНЕСКО ҳамчунин чандин муҳокимаҳо оид ба таърих ва барномаҳои навтаҳияшудаи соҳаи радиошунавонӣ барпо мешаванд. Баррасии чунин мавзуъҳо дар назар аст: «Васоити радиои ҷавонон», «Барои иҷрои вазифаи худ кушта шудаанд: таҳдид ба рӯзноманигорони радио», «Нақшаи амали СММ перомуни таъмини амнияти рӯзноманигорон», «Радиошунавонӣ дар мавҷи кӯтоҳ: боқимондаи замони гузашта?». Мавриди зикр аст, ки 13 феврал-рӯзи таъсиси «Радиои СММ» дар соли 1946 буда, он аз ҷониби директори генералии ЮНЕСКО пешниҳод шудааст. Дар ин бора ба АМИТ «Ховар» аз намояндагии ЮНЕСКО хабар доданд.