Таъсиси гурӯҳи корӣ

Душанбе, 27 феврал. (АМИТ «Ховар», Ибодат Давлатова). – Ба манзури такмил додани Қонуни Ҷумҳурии Тоҷикистон «Дар бораи муқобилат ба вируси норасоии масунияти одам ва бемории пайдошудаи норасоии масуният» бо ибтикори Кумитаи ҳамгироии миллӣ, Вазорати тандурустии Ҷумҳурии Тоҷикистон, Маркази ҷумҳуриявии ҷилавгирӣ ва мубориза бо СПИД аз ҷумлаи сохторҳои давлатӣ, созмонҳои байналмилалӣ ва намояндагони ҷомеаи шаҳрвандӣ гурӯҳи корӣ таъсис ёфтааст.Тавре ки аз Кумитаи ҳамгироии миллии ҶТ ба АМИТ «Ховар» хабар доданд, Барномаи рушди Созмони Милали Муттаҳид дар Тоҷикистон барои омӯзиши ин масъала мушовири бахши масоили вируси норасоии масунияти одам, тансиҳатӣ ва рушдро ба Тоҷикистон даъват намудааст. Вазифаи асосии гурӯҳи корӣ иборат аз хулосаи таҳлилии қонун дар бораи вируси норасоии масунияти одам ва бемории пайдошудаи норасоии масуният дар Ҷумҳурии Тоҷикистон, ҳамчунин меъёрҳои дигари дахлдор ва санадҳои қонунгузорӣ мебошад. Алҳол пешниҳодҳо дар мавриди ворид намудани иловаю тағйирот ба қонунгузории Ҷумҳурии Тоҷикистон ҷамъбаст карда мешаванд.