«Тоҷикстандарт»: мутобиқсозии стандартҳо

Душанбе, 12 феврал. (АМИТ «Ховар», Бекназари Абӯбакр). — Масъалаҳои рушди бамеъёрдарории техникӣ ва стандартҳо, ҷорӣ намудани низоми нави идораи сифат дар корхонаҳои ватанӣ тибқи талаботи стандартҳои байналмилалии ИСО 9001 ва ИСО 22000 имрӯз дар шаҳри Душанбе дар ҷараёни семинаре, ки бо ибтикори Агентии давлатии «Тоҷикстандарт» доир шуд, баррасӣ гардиданд. Семинар ҷиҳати татбиқи Қарори Ҳукумати Ҷумҳурии Тоҷикистон «Дар бораи барномаи давлатии сифат барои солҳои 2013-2015» бо иштироки доираи васеи соҳибкорони ватанӣ, намояндагони вазорату идораҳои дахлдор, созмонҳои байналмилалӣ ва ассотсиатсияҳои миллии дастгирии соҳибкории хурду миёна роҳандозӣ шудааст. Дар чорабинӣ ташкилотҳои байналмилалӣ фаъолияти хешро дар самти дастгирӣ ва рушди соҳибкорӣ муаррифӣ намуда, истеҳсолкунандагони ватаниро бо барномаву лоиҳаҳои хеш ҷиҳати рушди истеҳсолоти босифат ва дастгирии соҳибкории хурду миёна шинос намуданд. Ҳадафи аслии семинар баланд бардоштани сифати истеҳсолоти ватанӣ ва ба ин восита мутобиқ намудани стандартҳои Тоҷикистон ба стандартҳои байналмилалӣ мутобиқи талаботи Созмони умумиҷаҳонии савдо мебошад.