Вохӯрии Абдулло Юлдошев бо Алоуддин ал-Аскарӣ

Душанбе, 28 феврал. (АМИТ «Ховар»).- 26 феврали соли 2013 вохӯрии Сафири Тоҷикистон дар Мамлакати Арабистони Саудӣ Абдулло Юлдошев бо ҷонишини вазири корҳои хориҷии Мамлакат оид ба масъалаҳои ташрифот сафир Алоуддин ал-Аскарӣ сурат гирифт. Дар суҳбат Сафири Тоҷикистон нусхаи барқияи таъзияи Президенти Ҷумҳурии Тоҷикистонро ба унвони Аълоҳазрат подшоҳ Абдулло ибни Абдулазиз Оли Сауд тақдим кард. Ҳамчунин Сафири Тоҷикистон ва ҷонишини вазир оид ба масъалаҳои тадорукотии нишасти Анҷумани ҳамкории кишварҳои араб ва чумҳуриҳои Осиёи Миёнаю Озарбойҷон дар сатҳи вазирони корҳои хориҷӣ, ки гузаронидани он рӯзи 13 апрел дар шаҳри Риёз пешбинӣ шудааст, табодули назар анҷом доданд. Масъалаҳои дигари тадорукотии шоистаи эҳтимоми муштарак низ мавриди муҳокима қарор гирифтанд.