Ворид намудани тағйирот ба қонуни ипотека

Душанбе, 20 феврал.(АМИТ «Ховар», Марзия Саидова).-Вакилони палатаи поёнии парлумони Тоҷикистон 20 феврал дар ҷаласаи навбатии иҷлосияи чоруми Маҷлиси намояндагон ба лоиҳаи Қонуни Ҷумҳурии Тоҷикистон «Дар бораи ипотека» тағйиру иловаҳо ворид намуданд. Муовини раиси Бонки миллии Тоҷикистон Абдулкарим Неъматов ва вакили Маҷлиси намояндагон Маҳмадшариф Нозимов ҳадафи ворид намудани тағйиру иловаҳоро ба лоиҳаи қонуни мазкур мутобиқ намудани он ба Қонуни Чумҳурии Тоҷикистон «Дар бораи фаъолияти бонкӣ» ва Кодекси замини Ҷумҳурии Тоҷикистон арзёбӣ намуданд. Дар асоси ворид намудани тағйиру иловаҳо ба лоиҳаи Қонуни Ҷумҳурии Тоҷикистон «Дар бораи ипотека» танҳо ҳуқуқи истифодаи замин бо ҳуқуқи бегона намудани он мумкин аст ба гарав гузошта шавад. Гарави истифодаи қитъаҳои замин нисбат ба қитъаҳои замине, ки ҳуқуқи истифодаи онҳо бе ҳуқуқи бегона намудани он ба даст оварда шудааст, манъ мегардад.