Вусъати соҳилбандӣ дар Кӯлоб

Кӯлоб, 15 феврал. (АМИТ «Ховар», С.Холов). – Бо мақсади пешгирии офатҳои табиӣ Ҳукумати Ҷумҳурии Тоҷикистон ва Вазорати мелиоратсия ва захираҳои об корҳои соҳилмустаҳкамкуниро дар ноҳияҳои минтақаи Кӯлоб вусъат бахшида истодаанд. Дар айни замон ҳамаи техникаҳои корхонаи зудамали Вазорати мелиоратсия дар сои Зиракии шаҳри Кӯлоб сафарбар шудаанд.Бояд зикр намуд, ки сои Зиракӣ аз маркази деҳаҳои сераҳолӣ мегузарад ва рахна гардидани соҳилҳои он дар давоми се соли охир ба даҳҳо гектар замини корам ва хонаҳои истиқоматии шаҳрвандон зарар расонидааст, зеро оби сой аз қаторкуҳҳои ноҳияи Муъминобод ҷорӣ мешавад ва суръаташ тез мебошад. Шумораи чунин сою дарёчаҳо дар минтақаи Кӯлоб зиёд аст ва кормандони вазорати мелиоратсия ва захираҳои оби Ҷумҳурии Тоҷикистон дар ҳамкорӣ бо ҳокимиятҳои маҳаллӣ мақсад доранд, то оғози боронҳои баҳор қисми зиёди сою дарёчаҳоро бехатар гардонанд.