Ҳамкориҳои ВКД бо Вазорати бехатарии ҷамъиятии Чин

Душанбе, 19 март. (АМИТ «Ховар», Ибодат Давлатова).-Баррасии лоиҳаи «Барнома оид ба тақвият бахшидан ба ҳамкорӣ байни Вазорати бехатарии ҷамъиятии Ҷумҳурии Мардумии Чин ва Вазорати корҳои дохилии Ҷумҳурии Тоҷикистон дар соли 2013» имрӯз дар вохӯрии вазири корҳои дохилӣ Рамазон Раҳимов бо Сафири Фавқулодда ва Мухтори Ҷумҳурии Мардумии Чин дар Ҷумҳурии Тоҷикистон Фан Сянжун муҳокима гардид. Тавре ки ба мухбири АМИТ «Ховар» аз ВКД иттилоъ доданд, дар вохӯрӣ Сафири Ҷумҳурии Мардумии Чин Фан Сянжун намояндаи расмии Вазорати бехатарии ҷамъиятии Ҷумҳурии Мардумии Чин Бян Юйтсзеро муаррифӣ намуд. Вазири корҳои дохилӣ Бян Юйтсзеро бо таъйин гардиданаш ба ин вазифаи пурмасъул табрик намуда, изҳор намуд, ки дар оянда ҳамкории Вазорати корҳои дохилии Ҷумҳурии Тоҷикистон бо Вазорати бехатарии ҷамъиятии Ҷумҳурии Мардумии Чин боз ҳам самаранок ва қавитар мегардад. Зимни вохӯрӣ тарафҳо масъалаҳои марбут ба густариши ҳамкории дуҷонибаро дар мавриди мубориза алайҳи ҷинояткорӣ, терроризм ва экстремизм, инчунин таҳдиду хатарҳое, ки эҳтимол аст пас аз хуруҷи нерӯҳои ТҲАШ (НАТО) аз Афғонистон ба миён оянд, баррасӣ намуданд.