Ҷаласаи Шӯрои ҳамоҳангсозӣ дар Кӯлоб

Кӯлоб, 1 март. (АМИТ «Ховар», С. Холов).- Бо мақсади пешгирӣ ва кам кардани бемории сил дар байни аҳолӣ аз тарафи Маркази вилоятии мубориза бар зидди бемории сили минтақаи Кӯлоб ҷаласаи Шӯрои ҳамоҳангсозӣ бо иштироки намояндагони шаҳру ноҳияҳои минтақа баргузор гардид. Чорабинии мазкур оид ба пешгирии ин бемории сироятӣ дар ноҳияҳои Восеъ, Хамадонӣ, Фархор, Шӯрообод ва Муъминобод гузаронида шуда, мувофиқи нақша рӯзҳои наздик дар ноҳияҳои Данғара, Темурмалик, Балҷувон ва Ховалинг низ гузаронида мешавад. Мувофиқи барнома дар ҳудуди ҳамаи шаҳру ноҳияҳо ва ҷамоату маҳаллаҳо мебояд нақшаи чорабиниҳои мушаххас тартиб дода шавад, зеро бемории сил асосан бемории иҷтимоӣ буда, рафъи камбизоатӣ, тозагии маҳал, рафтору ахлоқи ҳамидаи инсонӣ кафолатдиҳандаи саломатии мардуманд.