Ҷамъомади таълимӣ дар Кӯлоб

Душанбе, 4 март. (АМИТ «Ховар», Кристина Эрлих). – Бо ибтикори Ситоди ҳолатҳои фавқулодда ва мудофиаи шаҳрвандии вилояти Хатлон ва минтақаи Кӯлоб дар шаҳри Кӯлоб ҷамъомади таълимии сардорони ситодҳои ҳолатҳои фавқулодда ва мудофиаи шаҳрвандӣ ва мудирони дафтарҳои методии шӯъбаҳои маорифи халқи минтақаи Кӯлоб баргузор гардид. Тавре ки аз Намояндагии Созмони мустақили байналмилалии Оксфам дар Тоҷикистон ба АМИТ «Ховар» хабар доданд, мақсад аз ҷамъомад баррасии масоили беҳдошти кори ситоду шӯъбаҳои маорифи халқ ҷиҳати таълиму омодагӣ ба офатҳои табиӣ дар донишкадаҳо, роҳандозии унсурҳои омодагӣ ба ҳолатҳои фавқулодда ва ҳодисаҳои табиӣ ба барномаи мактабӣ ва такмили усулҳои кор буд. Дар ҷамъомад ба такмили усулҳои таълими аҳолӣ, мактабиён барои омодагӣ ба ҳолатҳои фавқулодда таваҷҷӯҳи хоса дода шуд.