Бозпас гирифтани 18 ҳазор маводи дорувории пастсифат аз муомилот

Кӯлоб, 5 март. (АМИТ «Ховар», С.Холов). – Намояндагии Хадамоти назорати давлатии фаъолияти фармасевтӣ дар минтақаи Кӯлоб дар асоси қарори Ҳукумати ҶТ ва назорати давлатии фаъолияти фармасевтӣ фаъолият карда, назорати истифодаи мақсадноки маводи доруворӣ, инчунин ба дорухонаҳо ворид шудани дорувориҳои гуногунро зери назорати қатъӣ гирифтааст.  Дар ҳудуди минтақаи Кӯлоб 208 дорухона фаъолият дошта, аҳолии шаҳру ноҳияҳоро бо доруворӣ таъмин менамояд. Ба гуфтаи манбаъ аз тарафи мутахассисони намояндагӣ мувофиқи нақшаи корӣ дар давоми соли ҷорӣ 118 дорухона, 9 беморхона, 58 нуқтаи фурӯши маводи ороишӣ санҷида шуда, дар натиҷа 273 адад маводи дорувории муҳлати истифодааш гузашта, 153 адад маводи дорувории бе сертификат, дар маҷмуъ 18 ҳазору 74 адад дорувор, ки маблағи умумиашон 4 миллиону 968 ҳазору 126 сомониро дар бар мегирад, дар асоси санад аз муомилот бозпас гирифта шуд.