Эмомалӣ Раҳмон: «Қуръон ҳуқуқи зану мардро баробар медонад»

Душанбе, 7 март. (АМИТ «Ховар», Дилшодаи Хайруллоҳ).-Имрӯз Президенти Ҷумҳурии Тоҷикистон Эмомалӣ Раҳмон дар суханронии табрикотии худ бахшида ба Рӯзи модар аз ҷойгоҳу мартабаи зан дар дини мубини ислом ёдовар шуда, иброз дошт, ки «Шинохти ҷойгоҳ ва ҳуқуқи зан дар таълимоти дини ислом мақоми хос дорад ва наҷобату шарофат, инчунин баробарии фитрии занону мардон дар каломи осмонии Худованди мутаол — Қуръони маҷид борҳо таъкид шудааст».  Эмомалӣ Раҳмон зан – модарро аввалин мураббии башарият хонда, таъкид дошт, ки зан на танҳо мураббӣ ва муаллимест, ки сухан мегӯяд, балки ҳамчун модар тамоми хислатҳои неки инсониро ба кӯдак ба таври табиӣ интиқол медиҳад. Аз ин рӯ, ба қавли Сарвари давлат шеваи рафтору ахлоқи модар дар сифати идроки фарзанд таъсири бевосита мегузорад. Президенти кишвар бо ёдоварӣ аз осори гузаштаи адабу фарҳанги тоҷик иброз дошт, ки : «Як модари хуб ба сад устод ва омӯзгор меарзад»