Фаъолияти 150 нафар шаҳрванди Тоҷикистон дар Канада

Душанбе, 12 март. (АМИТ «Ховар», Покиза Маҳмадбекова). – Дар Душанбе вохӯрии сардори Хадамоти муҳоҷирати назди Ҳукумати Ҷумҳурии Тоҷикистон Сафиало Девонаев бо директори Хадамоти муҳоҷирати шаҳри Квебеки Канада Шоҳисматулло Ҳабибӣ баргузор гардид.  Тавре ки ба мухбири АМИТ «Ховар» аз шуъбаи робита бо ҷомеаи ХМ назди Ҳукумати ҶТ иттилоъ доданд, дар вохӯрӣ С. Девонаев зикр намуд, ки: «Имрӯзҳо Хадамоти муҳоҷират ҷиҳати ба танзим даровардани раванди муҳоҷират ва сафарбаркунии муҳоҷирон дар масири дуруст тадбирҳои судманд меандешад. Аз ин лиҳоз моро лозим аст, ки таҷрибаи кишварҳои Туркия, Филипин, Малайзияро дар самти муҳоҷирати меҳнатӣ омӯхта ва раванди муҳоҷирати меҳнатиро дар Тоҷикистон ба танзим дарорем». Ба гуфти Шоҳисматулло Ҳабибӣ дар Канада аллакай зиёда аз 150 нафар шаҳрванди Тоҷикистон зиндагӣ ва фаъолият менамоянд. Мо бо онҳо ҳамеша дар тамос буда, аз аҳволи онҳо бохабарем ва кӯмакҳои худро баҳрашон дареғ намедорем. Надоштани касб ва надонистани забон мушкилии асосии муҳоҷирони меҳнатӣ мебошад. Хуб мешуд, ки муҳоҷирони тоҷик низ қабл аз сафар забонҳои англисӣ, фаронсавиро азхуд намуда ва дорои касби муайян бошанд, то ҳангоми фаъолияти меҳнатӣ дар хориҷа ба душвориҳо дучор нагарданд, зикр намуд Шоҳисматулло Ҳабибӣ.