Кашфи тарёкхона дар шаҳри Душанбе

Душанбе, 27 март. (АМИТ «Ховар», Ибодат Давлатова).-Кормандони Агентии назорати маводи нашъаовари назди Президенти Ҷумҳурии Тоҷикистон дар қаламрави пойтахти кишвар дар ҷараёни тафтиш ва татбиқи маълумоти фаврӣ тарёкхонаеро ошкор намуданд, ки дар як хонаи хусусӣ ташкил шуда буд.Тавре ки ба мухбири АМИТ «Ховар» аз Агентии мазкур иттилоъ доданд, соҳиби он сокини 30-солаи шаҳри Душанбе буд ва дар ҷараёни боздошт дар ин хона се нафар дар ҳолати сархушӣ аз истеъмоли маводи мухаддир ҳузур доштанд. Ба гуфти манбаъ ҳангоми аз назар гузаронидани хона кормандони фаврӣ якчанд сӯзандору бо маводи мухаддирро ёфтанд, ки барои истеъмол омода шуда буд. Ҳамаи моддаҳои ошкоршуда дар шоҳидии гувоҳон мусодира шуда, барои ташхис ирсол шуданд. Дар айни замон агентӣ ҷузъиёти рӯйдодро мавриди таҳқиқи пурра қарор додааст ва санҷиши тарёкхона идома дорад.