Мулоқоти Н. Зоҳидов бо Бандар Муҳаммад Ҷамил

Душанбе, 7 март.(АМИТ «Ховар»,Фарзона Достонзода.)-Муовини вазири корҳои хориҷии Ҷумҳурии Тоҷикистон Низомиддин Зоҳидов Сафири Фавқулодда ва Мухтори Шоҳигарии Арабистони Саудӣ Бандар Муҳаммад Ҷамилро бо хоҳиши эшон 5 март ба ҳузур пазируфт.  Зимни мулоқот мавзуъҳои рушди муносибатҳои дуҷониба, ҳамкориҳо дар чаҳорчӯби созмонҳои байналмилалӣ ва минтақавӣ, аз ҷумла, иштироки ҳайати Шоҳигарии Арабистони Саудӣ дар нишасти вазирони корҳои хориҷии аъзои Муколамаи ҳамкориҳои Осиё, ки 29 марти соли ҷорӣ дар шаҳри Душанбе баргузор мегардад, табодули назар шуданд. Сафир таъкид дошт, ки муовини аввали вазири корҳои хориҷии Шоҳигарии Арабистони Саудӣ Волоҳазрат Абдулазиз ибни Абдулло Оли Сауд ҳайати саудиро дар ин Муколама роҳбарӣ мекунад. Дар вохӯрӣ ҳамчунин масъалаҳои дигари муносибатҳои дуҷониба мавриди баррасӣ қарор гирифтанд.Дар ин бора ба АМИТ «Ховар»,аз Вазорати корҳои ҳориҷии кишвар иттилоъ доданд.