Мулоқоти Н. Зоҳидов бо М. М. Дирек

Душанбе, 6 март (АМИТ «Ховар»).-5 марти соли 2013 мулоқоти муовини вазири корҳои хориҷии Ҷумҳурии Тоҷикистон Низомиддин Зоҳидов бо Сафири Фавқулодда ва Мухтори Ҷумҳурии Туркия Меҳмет Мунис Дирик баргузор гардид.Дар мулоқот сафири Ҷумҳурии Туркия номаи вазири корҳои хориҷии кишвараш А. Довутоғлуро ба вазири корҳои хориҷии Ҷумҳурии Тоҷикистон Ҳ. Зарифӣ доир ба тасмими Туркия ҷиҳати баргузории намоишгоҳи байналмилалии ЭКСПО-2020 дар шаҳри Измир супорид. Зимни мулоқот ҷонибҳо масоили вобаста ба густариши ҳамкориҳои байни ду кишварро дар партави мувофиқатҳое, ки ҳангоми сафари расмии Президенти Ҷумҳурии Тоҷикистон Эмомалӣ Раҳмон ба Ҷумҳурии Туркия дар моҳи декабри соли 2012 ҳосил шуда буданд, мавриди баррасӣ қарор доданд. Ҷонибҳо таъкид карданд, ки татбиқи ин мувофиқатҳо ҳамкориҳои гуногунҷанбаи ду кишвари дӯстро ба сатҳи сифатан нав мебарорад.Вохӯрӣ дар фазои ҳусни тафоҳум сурат гирифт.