Мустаҳкам гардонидани системаи иттилоотии тандурустӣ

Душанбе, 12 март. (АМИТ «Ховар», Ибодат Давлатова).-Имрӯз дар шаҳри Душанбе бо мақсади ворид намудани технологияи муосири иттилоотию комуникатсионӣ, таъмини дастрасии саривақтии иттилоот ва эътимоднокии маълумот оид ба солимии аҳолӣ ва фаъолияти муассисаҳои тандурустӣ бо дастгирии Ҳукумати Ҷумҳурии Тоҷикистон, Вазорати тандурустии Ҷумҳурии Тоҷикистон Лоиҳаи кӯмаки техникии Иттиҳоди Аврупо оид ба мустаҳкам гардонидани системаи иттилоотии тандурустӣ дар Ҷумҳурии Тоҷикистон оғоз гардид. Бояд гуфт, ки дар марҳалаи аввали татбиқи лоиҳа вазъи системаи иттилоотии тандурустӣ пурра мавриди омӯзиш ва баҳодиҳӣ қарор дода шуда, тавсияҳои мушаххас оид ба такмили системаи амалкунанда қабул шуданд. Дар марҳалаи кунунӣ лоиҳа, ки бештар аз 3 сол идома меёбад, бо таҷҳизоти компютерӣ, алоқа бо истифода аз шабакаи нахӣ-нурӣ ва барномаи компютерии тандурустӣ дар маҳал DHIS2 (District Health Information Software) таъмин намудани сохторҳои омории тандурустӣ ва сабти асноди ҳолати шаҳрвандии шаҳру ноҳияҳо, ҳолатҳои демографӣ, фаъолияти муассисаҳои тандурустӣ, аз ҷумла аз тариқи мустақим (on-line) дастрас намудани иттилоот оид ба беморшавии аввалияи аҳолӣ дар назар дошта шудааст.