Намоишгоҳи байналмилалии туристии ITB Берлин-2013

Душанбе, 12 март. (АМИТ «Ховар», Дилшодаи Хайруллоҳ).-6 марти соли равон дар пойтахти Олмон- шаҳри Берлин чилуҳафтумин намоишгоҳи байналмилалии туристӣ — ITB Берлин-2013 ба кори худ оғоз кард. Кишвари моро дар ин форуми бузурги байналмилалӣ намояндагони ширкатҳои туристии мамлакат таҳти роҳбарии раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Маликшо Неъматов намояндагӣ карданд.Дар расми ифтитоҳи намоишгоҳ, ки бо ҳузури конслери Олмон Ангела Меркел доир гардид, зикр шуд, ки дар намоишгоҳ намояндагони 188 мамлакати дунё ширкат доранд. Соли равон кишвари ҳамшарики ITB-2013- Индонезия масъули ифтитоҳи намоишгоҳ махсуб меёфт, ки имконоти туристии минтақаҳои қитъаи Осиёро муаррифӣ менамояд. Ҳамчунин дар доираи баргузории намоишгоҳ машварати вазирони туризми Роҳи абрешим баргузор шуд, ки дар кори он раиси Кумитаи ҷавонон, варзиш ва сайёҳи Маликшо Неъматов дар бораи бо ҳам омезиш ёфтани фарҳанги анъанаҳо, муколамаву тиҷорат дар сатҳи байналмилалӣ ва имконоти саноати туризми кишвар андешаҳои ҷолиб баён дошт. Дар доираи намоишгоҳ бузургтарин конгресси туристии ҷаҳон баргузор мешавад. Ин чорабинӣ аз соли 2004 ҳамасола дар якҷоягӣ бо ITB доир мегардад. Дар конгресс муҳимтарин масоили соҳаи туризм муҳокима шуда, дар он таҷрибаи беҳтарин ширкатҳо муаррифӣ хоҳад гашт.Ёдовар мешавем, ки намояндагони ҷумҳурии мо дар ин ҳамоиши калонтарини туристӣ бори шашум аст, ки ширкат меварзанд.Намоишгохи мазкур то 10 марти соли равон идома ёфт.Дар ин бора хабарнигори рӯзномаи «Ҷавонони Тоҷикистон» Самариддин Асозода аз шаҳри Берлин иттилоъ дод.