Пешниҳоди хизматрасониҳои нав ба мардум

Кӯлоб, 27 март. (АМИТ «Ховар», Ф. Мадаминов). – Дар арафаи ҷашни Наврӯз дар ҷамоати Даҳанаи шаҳри Кӯлоб бо ташаббуси соҳибкор Саймурод Иброҳимов ва дастгирии ташкилоти байналмилалии «Оксфам» маркази байторӣ барои беҳдошти ҳайвонҳои шохдори калону майда, мурғҳо ва оилаҳои замбӯр таъсис ёфт. Ташкилоти «Оксфам» барои сохтмон ва хариди таҷҳизоти нави байторӣ зиёда аз 14 ҳазор доллар сарф намудааст. Маркази мазкур дар деҳаи Танел ҷойгир шуда, ҳамзамон хизмати худро ба 10 қишлоқи атроф барои нигаҳдошти ҳайвонот, мурғҳо ва замбӯрҳо аз касалиҳои сироятӣ мерасонад. Ҳамзамон бо ташаббуси ташкилоти «Оксфам» дар оянда боз 5 маркази байторӣ кушода мешавад. Дар шаҳри Кӯлоб 2 адад, дар ноҳияи Темурмалик 2 адад ва ҳамин гуна як маркази дигар дар ноҳияи Восеъ таъсис дода мешавад. Ташкилоти байналмилалии «Оксфам» ният дорад дар оянда чунин марказҳоро дар ноҳияҳои Муъминобод ва Восеъ низ ба истифода диҳад, то ки онҳо барои беҳдошти саломатии мардум ва ҳифзи одамон аз сирояти касалиҳои ҳайвонот хизмат кунанд.