Шуъбаи касалиҳои сироятии беморхонаи Панҷ таъмир шуд

Душанбе, 1 март. (АМИТ «Ховар», Дилшодаи Хайруллоҳ).- «Лоиҳаи барқароркунии шуъбаи касалиҳои сироятии кӯдаконаи Беморхонаи марказии ноҳияи Панҷ» бо маблағи умумии 108 ҳазору 800 доллари ИМА, ки аз тарафи Ҳукумати Ҷопон дар чаҳорчӯбаи кӯмакҳои бебозгашти лоиҳаҳои амнияти башарӣ барои бахши аъзами аҳолӣ дастгирӣ ёфта буд, бо муваффақият ба итмом расид. Ҳарорати баланди ноҳияи Панҷ дар фасли тобистон ва мавқеи ҷойгиршавии ҷуғрофии он, ки бо Ҷумҳурии Исломии Афғонистон ҳамсарҳад мебошад, барои гирифтор шудани кӯдакон ба касалиҳои сироятӣ, ба монанди гепатити А ва домана таъсири худро мерасонад. Барои табобати касалиҳои сироятӣ шуъбаи касалии сироятии кӯдаконаи Беморхонаи марказии ноҳияи Панҷ соли 1978 сохта шуда, аз ҳамон сол бино ягон бор таъмир нашудааст. Набудани таҷҳизоти зарурӣ мушкилоти асосӣ барои гузаронидани муолиҷа буд. Баъди ба итмом расидани лоиҳа дар айни замон бинои шуъба пурра таъмир гардид ва он бо таҷҳизоти асосӣ барои муолиҷа муҷаҳҳаз гардонида шуд. Дар натиҷа 1800 кӯдаки гирифтори касалии сироятӣ метавонад ёрии таъҷилии заруриро дар ин шуъба сари вақт дастрас намояд.