Шуъбаи суғдии Иттифоқи нависандагон 60-сола мешавад

Душанбе, 12 март. (АМИТ «Ховар», Бекназари Абӯбакр). — Нимаи дуюми моҳи майи соли равон 60-солагии шуъбаи суғдии Иттифоқи нависандагони Тоҷикистон дар қаламрави вилояти Суғд ҷашн гирифта мешавад. Дар ин бора қарори раиси вилояти Суғд Қоҳир Расулзода ба тасвиб расид.Тибқи қарори мазкур дар доираи таҷлил аз 60-солагии шуъбаи суғдии Иттифоқи нависандагон гузаронидани маҳфилу чорабиниҳо, аз қабили мулоқоту вохӯриҳои адибон бо хонандагон ва донишҷӯёни мактабҳои миёнаву олӣ, маҳфили адабии адибони ҷавон, муаррифии китобҳои тозанашри адибони вилоят ва маҳфилҳои ёдбуди адибон Раҳим Ҷалил, Аминҷон Шукуҳӣ, Аъзам Сидқӣ, Карим Абдулов, Додоҷон Раҷабӣ ва Ғуфрон Рустамов дар назар аст.