Синергияи мубоҳисаҳо ва санъат — усули нави рушди ҷавонон

Душанбе, 14 март. (АМИТ «Ховар», Музаффар Рустамов).– 15 ва 17 марти соли равон бо дастгирии молиявии шуъбаи Ташкилоти байналмилалии Институти «Ҷамъияти Кушода» — Бунёди Мадад дар Тоҷикистон дар Маркази фарҳангии «Арт Граунд»-и шаҳри Душанбе бо иштироки тренери Ассосиатсияи байналмилалии таҳсилотии мубоҳисаҳо (IDEA) Талмуд Бах тренинг дар мавзӯи «Синергияи мубоҳисаҳо ва саҳнаҳои театрӣ» баргузор мегардад. Ҳадафи тренинг фароҳам овардани имконияти кори якҷоя ба ҷавонон барои ба таври эҷодкорона ифода намудани назару ақидаи худ, ба сохтори муайян даровардани нутқ ва далеловарии мантиқӣ мебошад. Ҳамчунин ҷавонон бояд малакаи нишон додани спектаклҳоро дар формати форуми театрҳо барои бурдани муколама бо тамошобинон ва муҳокимаи масъалаҳои муҳим азхуд кунанд. Синергияи мубоҳисаҳо ва саҳнаҳои театрӣ аз усулҳои самараноки таълими ғайрирасмӣ буда, барои гирифтани донишу малакаи зарурии рушд дар ҷомеаи демократӣ равона шудаанд.