Тайёрӣ ба иди Наврӯз

Восеъ, 1 март. (АМИТ «Ховар», С. Холов).- Дар ноҳияи Восеъ масъулини ташкилоту муассисаҳо, ҷамоатҳои шаҳраку деҳот ва дигар сохторҳои ҷамъиятию давлатӣ ба таҷлили иди Наврӯзи Аҷам омодагӣ дида, дар айни ҳол ба ободу зебо гардонидани кӯчаҳою маҳаллаҳо ва шинонидани ниҳолҳо шуруъ кардаанд. Дар ҷамоати деҳоти Гулистон то ин муддат 14 ҳазору 800 бех ниҳоли сояафкан ва мевадиҳанда шинонида шуда, дар айни ҳол аҳолӣ ба тозаю озода гардонидани кӯчаю маҳаллаҳо ва роҳҳо сафарбар шудаанд. Барои дар сатҳи баланд пешвоз гирифтани иди Наврӯз аз тарафи масъулини ҷамоат озмуни «Фарҳанги деҳадорӣ» эълон гардидааст, ки дар он хонаи беҳтарин, кӯчаи беҳтарин, омӯзгори беҳтарин, табиби беҳтарин аз тарафи аъзои комиссия санҷида шуда, ғолибон бо туҳфаҳои молӣ сарфароз гардонида мешаванд. Гуфта мешавад дар ҳудуди ҷамоат 8 деҳа мавҷуд буда, сокинони деҳот тасмим гирифтаанд, то ҷашни Наврӯзи Аҷамро бо суннатҳои аҷдодӣ гузаронанд.