Вакилон дар маркази шаҳр ҷамъ меоянд

Душанбе, 15 март.(АМИТ “Ховар”, Марзия Саидова).- Иҷлосияи сездаҳуми Маҷлиси вакилони халқи шаҳри Душанбе даъвати чорум 28 марти соли равон дар шаҳри Душанбе баргузор мегардад. Дар ин бора раиси шаҳри Душанбе Маҳмадсаид Убайдуллоев қарор ба имзо расонд. Интизор меравад, ки вакилони Маҷлиси шаҳрӣ дар иҷлосия маҷмӯи масъалаҳои марбут ба рушди соҳаҳои мухталифи шаҳрдориро мавриди баррасӣ қарор медиҳанд. Дар назди вакилони шаҳрӣ Ҷамшед Мансуров-муовини раиси шаҳр доир ба ҷараёни иҷрои самараноки нақшаи амал оид ба таъсис ва таҷдиду навсозии корхонаҳои истеҳсолии саноатии шаҳри Душанбе дар солҳои 2012-2013 ва вакили Маҷлиси шаҳрӣ аз ҳавзаи интихоботии №59 Н. Шоев оид ба иҷрои ваколатҳои худ ҳисобот медиҳанд. Инчунин Аъламхон Қурбонов-раиси ноҳияи Исмоили Сомонии пойтахт дар масъалаи ҷараёни иҷрои нақшаҳои омодагии ноҳияи мазкур ба таҷлили 90 — солагии шаҳри Душанбе ҳамчун пойтахти Ҷумҳурии Тоҷикистон, ки соли 2014 таҷлил мегардад, гузориш медиҳад. Дар фарҷоми иҷлосия тасдиқи қарорҳои раиси шаҳри Душанбе дар назар дошта шудааст.