Вохӯрии Афшин бо кӯдакони мариз

Душанбе, 11 март. (АМИТ «Ховар», Ибодат Давлатова).- Имрӯз дар шуъбаи кӯдаконаи Маркази илмии ҷумҳуриявии саратоншиносӣ бахшида ба фарорасии баҳору ҷашни аҷдодии Наврӯз вохӯрӣ доир шуд. Чорабинии мазкур бо ташаббуси Фонди хайрияи «Лона» ва бо дастгирии ширкати «Next One» барои хушҳол сохтани хотири ин маризон бо иштироки овозхони машҳури эрониасл Афшин баргузор гардид. Ин чеҳраи шинохтаи олами санъат, ки бо сурудҳояш хеле маҳбуб гардидааст, бо маризони шуъбаи кӯдаконаи ин марказ суҳбат намуда ва ба кӯдакон туҳфа тақдим намуд.Директори Фонди хайрияи «Лона» Ҷӯрахон Бобохонов зикр намуд, ки кормандони Фонд тасмим доранд дар оянда бо истифода аз имкониятҳои мавҷуда барои кӯмаку дастгирии ҳамаҷонибаи чунин беморон як маркази замонавии онкологии муҷаҳҳаз бо тамоми технологияи зарурӣ ва сатҳи баланди хизматрасониро мавриди истифода қарор диҳанд.