Ҷамъбасти фаъолияти мақомоти омори Тоҷикистон

Душанбе, 22 апрел. (АМИТ «Ховар», Покиза Маҳмадбекова). — Дар Агентии омори назди Президенти Ҷумҳурии Тоҷикистон ҷаласаи васеи мушовараи агентӣ «Дар бораи ҷамъбасти фаъолияти мақомоти омори давлатии ҶТ дар семоҳаи якуми соли равон» баргузор гардид. Дар ҷаласа зикр гардид, ки мақомоти омор дар самти омодагӣ ва иҷрои корҳои ташкилӣ оид ба гузаронидани барӯйхатгирии кишоварзӣ дар Ҷумҳурии Тоҷикистон дар соли 2013 як силсила корҳоро ба анҷом расонид. Лоиҳаи Фармони Президенти Ҷумҳурии Тоҷикистон “Дар бораи гузаронидани барӯйхатгирии кишоварзӣ дар қаламрави Ҷумҳурии Тоҷикистон” дар соли 2013 омода ва бо вазорату идораҳои дахлдор мувофиқа карда шуд.  Ҳамзамон масъалаҳои вобаста ба ҷорӣ намудани ҳисоботи омории электронӣ, ташкили ҳамкории мутақобилаи иттилооти байналхалқӣ, ҷалби маблағҳои шарикони рушд барои татбиқи «Стратегияи миллии рушди омор барои солҳои 2012-2016», хусусан гузаронидани барӯйхатгирии кишоварзӣ дар соли 2013, риояи методологияи амалкунандаи ташаккули омори расмӣ ва истифода аз методологияи муосири байналхалқӣ дар низоми омори миллӣ, татбиқи тавсияҳои ҳисоботи арзёбии глобалиро, ки аз ҷониби омори Аврупо ба анҷом расидаанд, баррасӣ гардиданд.