Ҷамъбасти семинари чоррӯзаи гумрукчиёни кишвар

Душанбе,5 апрел. (АМИТ «Ховар», Фарзонаи Давлат)-Шуруъ аз 1-ум то 4-уми апрели соли равон шонздаҳ нафар кормандони кумитаи гумрук аз пойтахт ва вилояти Хатлон дар семинари чоррӯза оид ба бехатарии шабакаҳои таъминотӣ барои кормандони мақомоти гумрук ширкат намуданд. Семинари мазкур, ки аз ҷониби Барномаи БОМКA (сарпарасташ — Иттиҳоди Аврупо, иҷрокунанда — БРСММ) дар ҳамкорӣ бо Маркази байналмилалии сиёсати рушди муҳоҷират (МБСРМ) ташкил шудааст, дар шаҳри Душанбе баргузор гардид. Тавре ки дар ин бора аз дафтари намояндагии Иттиҳоди Аврупо дар Тоҷикистон хабар доданд,тренерҳо, ки аз кишварҳои аврупоӣ даъват гардида буданд, доир ба таҷриба ва сохтори тартиботи гумрукии Иттиҳоди Аврупо ва ҳамчунин нақши ҳамкорӣ бо кишварҳои ҳамсоя табодули назар намуданд. Илова бар ин иштирокчиёни семинар бо технологияи навтарини ренгенӣ, ки дар кишварҳои аврупоӣ истифода мешавад, ошноӣ пайдо намуданд. Гуфта мешавад, ки ҳадафи барномаи БОМКА- ин кӯмак намудан дар такмили бехатарӣ дар Осиёи Марказӣ, мусоидат дар қонунӣ гардонидани тиҷорат ва транзит ва ҳамчунин пешгирии убури ғайриқонунии одамон тавассути сарҳадоти Осиёи Марказӣ мебошад. Ёдрас мешавем, ки Барномаи БОМКA аз ҷониби Иттиҳоди Аврупо маблағгузорӣ гардида ва фаъолиятҳои он тавассути БРСММ ва Маркази Байналмилалии Сиёсати Рушди Муҳоҷират амалӣ мешаванд.