Дар Хатлон ҳодисаҳои худкушӣ меафзояд

Қӯрғонтеппа, 5 апрел. (АМИТ «Ховар», Мурод Сотиев). – Дар ҷаласаи Шӯрои ҳамгироии мақомоти ҳифзи ҳуқуқи вилояти Хатлон сабабҳои худкушӣ ва роҳҳои ҷилавгирии он муҳокима шуданд. Тавре ки аз прокуратураи вилояти Хатлон ба АМИТ «Ховар» хабар доданд, дар кори ҷаласа роҳбарони ҳамаи мақомоти ҳифзи ҳуқуқи вилоят, муовини раиси вилоят, раисони кумитаҳои кор бо занон ва шӯъбаҳои маорифи шаҳру ноҳияҳо, созмонҳои ҷавонон ва ҷамъиятӣ, намояндагони кумитаҳои маҳаллаҳо ширкат доштанд.Дар ҷаласа зикр шуд, ки соли 2012 дар вилояти Хатлон 136 ҳодисаи худкушӣ ба қайд гирифта шуд, ки назар ба соли 2011 – ум баробари 14 ҳодиса зиёд аст. Афзоиши худкушӣ дар ноҳияҳои Мӯъминобод, Восеъ, Ёвон, Кӯлоб, Қубодиён, Шаҳритус, Фархор ва Вахш ба назар мерасад.